ஒசோங்-சோங்ஜு, (தென்) கொரியா - திருவள்ளுவர் ஆண்டு 2051, தை மாதம் 12-நாள் (சனவரி 26) அன்று கொரிய தமிழ்ச் சங்கம் ஏற்பாடு செய்திருந்த கொரிய பொங்கல்-2020 நிகழ்வு Korea Chungcheong-buk-do provincial government and Mulberry-Bio co-ordinate system (Chungcheong-buk-do) உதவியுடன் கே-பயோ நிலையத்தின் (K-bio center) அரங்கில் தமிழர் திருநாளுக்குரிய தித்திக்கும் பொங்கல்-கரும்பு, மகிழ்ச்சி பரிமாற்றத்துடனும் பண்பாட்டு விழிமியங்களுடனும் இனிதே நடந்தேறியது. நிகழ்வின் முக்கிய அங்கமாக தமிழர் திருநாள் உரையாற்றிய கொரிய தமிழ்ச் சங்கத்தின் தலைவர் முனைவர் சுப்பிரமணியன் இராமசுந்தரம் அவர்கள்,

“அன்பிலார் எல்லாம் தமக்குறியர் அன்புடையார்
என்றும் உரியர் பிறர்க்கு”

என்ற திருக்குறளை சொல்லி உலகிற்கும் தாய்நாட்டிற்கும் தமிழர்களின் அன்பான வணக்கத்தை உரித்தாக்கி தமிழர் திருநாள் - 2020 உரையை தொடங்கிய தலைவர் அவர்கள், முதலில் கொரியா-இந்திய உறவுகளின் முக்கியத்துவம் குறித்து பேசினார். கொரியப் போரில் களத்தில் இந்திய பாராச்சூட் படையணி ஆற்றிய மருத்துவ உதவிப்பணி, இங்கு பல நாடுகளின் தூதரகங்கள் வருவதற்கு முன்பே தொடங்கிய கன்சுலார் அளவிலான இந்திய-கொரிய உறவுகள், இரு நாடுகளுக்கிடையே நிலவும் பாதுகாப்பு மற்றும் தொழில் ஒத்துழைப்பு ஆகியவை பற்றி குறிப்பிட்ட தலைவர் அவர்கள் கொரியாவிற்கு வரும் ஒவ்வொரு இந்தியரும் முக்கியமானவரே ஆகவே அனைவரும் இந்திய-கொரிய உறவுக்கு மேலும் வலுசேர்க்க இங்கிருக்கும் ஒவ்வொரு இந்தியரும் பங்காற்ற வேண்டும் என்றார்.

அடுத்ததாக 1987-களில் கொரியா வந்த தமிழர் தொன்மை ஆய்வாளரான ஒரிசா பாலு அவர்களின் காலத்தை ஒரு முக்கிய புள்ளியாக எடுத்துக்கொண்ட தலைவர் அவர்கள், 1987 முதல் விரிந்திருக்கும் சமகால கொரிய தமிழர் வரலாற்றை விளக்கினார். 1987 முதல் கொரியாவில் வந்து பணியாற்றிய தமிழ்நாட்டு பொறியாளர்கள் மற்றும் முனைவர் பட்டம் பெற்ற ஆராய்ச்சியாளர்கள் ஆகியோரின் மேலான உழைப்பின் பலனாகவே இன்று தமிழ்நாட்டைச் சேர்ந்த பலரும் முனைவர் பட்ட ஆராய்ச்சி, பொறியியல் மற்றும் தொடர்புடைய துறைகளில் கொரியாவில் வாய்ப்புகளை பெறுகிறார்கள் என்று தம் முன்னோடிகளுக்கு புகழாரம் சூட்டினார். தாம் அறிந்தவரை 2000-ம் ஆண்டு முதல் தமிழ்நாட்டைச் சேர்ந்த குறுகிய எண்ணிக்கையிலான மாணவர்கள் அறிவியல் தொழில்நுட்பம் மற்றும் பொறியியல் துறைகளில் முனைவர் பட்ட ஆராய்ச்சிக்கு வர தொடங்கியதாக குறிப்பிட்ட தலைவர் அவர்கள் இன்று அந்த எண்ணிக்கை பல நூறுகளாக அதிகரித்திருப்பதையிட்டு மகிழ்ச்சி தெரிவித்தார். மேலும் இங்கு 2000 ம் ஆண்டில் கொரியாவிற்கு வந்து உணவாக தொழில் தொடங்கி அந்த துறையில் இந்தியர் பலர் வர முன்னோடியாக இருக்கும் தமிழ்நாட்டைசேர்ந்த உணவகத்தின் உரிமையாளர்கள் திரு. பிரின்ஸ் மற்றும் திருமதி சாந்தி பிரின்ஸ் அவர்கள் பங்களிப்பை மக்களிடம் பகிர்ந்துகொண்டார்.

அதேநேரம், சமகால கொரிய தமிழர் வாழ்வு சுமார் 33 ஆண்டுகளுக்கு முன்பு தொடங்கினாலும், இங்கு தமிழர்கள் பெரும்பாலும் சில ஆண்டு ஒப்பந்த அடிப்படையில் உயர் தொழில்நுட்ப பணிபுரிபவர்களாக இருக்கும் நிலையே தொடர்கிறது என்ற தலைவர் அவர்கள் கொரியாவாழ் தமிழர்கள் உள்ளிட்ட இந்தியர் அனைவரும் தொழில்முனைவோராக, கொரியாவின் வளர்ச்சிக்கு பங்காற்றும் கண்டுபிடிப்பாளர்களாக அடுத்த கட்டத்திற்கு சென்று மேன்மேலும் மிளிர வேண்டியதன் தேவைப்பாடு பற்றியும் பேசினார். அதே நேரம், அமெரிக்கா போன்ற மேலை நாடுகளில் சாதித்த பேராசிரியர்கள் ஆறுமுகம் மந்திரம், தாயுமானவன், இராமமூர்த்தி இரமேஷ் மற்றும் பொறியாளர் சுந்தர் பிச்சை போன்றோரையும் இந்தியாவில் அதிகம் சாதித்த சிறுபான்மை இனமான பர்சிக்களில் இருந்து வந்த சம்செட்சி டாடா மற்றும் ஹோமி சகாங்கீர் பாபா போன்றோரை எடுத்துக்காட்டாக எடுத்து பயணிக்க வேண்டும் என்றார். இவ்வாறன பணிகளுக்கு இந்திய தூதரகம் தன்னாலான வேலைத் திட்டங்களை மேற்கொள்ள வேண்டுமென்றும் கேட்டுக்கொண்டார்.

உரையின் முக்கிய பகுதியாக மகாத்மா காந்தியடிகளின் அறவழி போராட்டம் நேதாஜி அவர்களின் ஆயுதப்போராட்டம் என அனைத்து வடிவத்திலும் தமிழர்கள் இந்திய நாட்டிற்கு ஆற்றிய பங்களிப்பு குறித்த பேசிய தலைவர், அவ்வாறே இளைஞர்களை கவர்ந்து இந்தியவின் ஆன்மீக கருத்துக்களை உலகெல்லாம் பரவச்செய்த தலைசிறந்த ஆன்மிக தலைவரான சுவாமி விவேகானந்தர் வாழ்விலும் ஆன்மிகம் பரப்பும் பணியிலும் தமிழர்களுக்கு இருக்கும் பங்களிப்பு குறித்தும் பேசினார். தொடர்ந்து, விவேகானந்தர் அவர்கள் சிகாகோ உலக சமய மாநாட்டில் பேசியதன் 125-வது ஆண்டு செப்டம்பர் 2018-ல் நிறைவுபெற்றதை குறிக்கும் வகையிலும் அவர் உலகிற்கு எடுத்துச்சென்ற இந்திய அடையாளங்களை வலுப்படுத்துவதற்காகவும் 2018 ஆகஸ்ட் முதல் இந்திய தூதரகம் வழியே நடத்தப்படும் கலாசார மையங்கள் அனைத்தும் சுவாமி விவேகானந்தர் கலாச்சார மையங்கள் என்று பெயர் மாற்றப்பட்டதை குறிப்பிட்டார் நிகழ்நிலையும் 2018 ஆகஸ்ட் ஊடக செய்திகளையும் மேற்கோள் காட்டி தலைவர் பேசினார். மேலும் அதனை வரவேற்ற தலைவர் அவர்கள், விவேகானந்தர் அவர்கள் சிகாகோ உரையை ஆற்றுவதற்கு புரவரலாக இருந்த மன்னர் பாஸ்கர சேதுபதி குறித்து பேசினார்.

மன்னர் சேதுபதி அவர்கள் நன்கு கல்வி கற்ற இந்தியாவை பயணித்து அறிந்துகொண்டவர் என்றும், தான் அழைக்கப்பட்டிருந்த சிகாகோ மாநாட்டிற்கு விவேகானந்தர் அவர்களின் ஆன்மிக ஞானத்தைக்கண்டு தமக்கு பதிலாக விவேகானந்தர் அவர்களை அனுப்பி அதற்கு புரவலராகவும் ஆனார் என்ற உலகறிந்த உண்மையை மன்னர் பற்றிய வரலாற்று குறிப்புகளில் இருக்கும் பதிவுகளை மேற்கோள்காட்டி எடுத்துரைத்தார். மேலும் பாஸ்கர சேதுபதி (1868–1903) அவர்கள் விவேகானந்தரைப் போன்று ((1863–1902) இளமைப்பருவத்திலே இயற்கை எய்தியவர் என்று குறிப்பிட்ட அவர், ஒரு மன்னராகவும் இளம்வயதினராகவும் இருந்தாபோதிலும் பெருந்தன்மையாக இந்தியாவின் ஆன்மிக நோக்கை உலகிற்கு சிறப்பாக கொண்டு செல்லும் நோக்கம் நிறைவேற வேண்டும் என்ற அடிப்படையில் மன்னர் பாஸ்கர சேதுபதி அவர்கள் செயல்பட்டிருப்பதை அறிய முடிகிறது என்றார்.

மேலும் மன்னர் பாஸ்கர சேதுபதி அவர்கள், விவேகானந்தர் பாம்பன் திரும்பியபோது எழுப்பிய தூணில் மேற்கோள்காட்டிய “சாத்தியமேவ ஜெயதே (வாய்மையே வெல்லும்)” என்ற வாசகமே பின்னாளில் 50 ஆண்டுகளுக்கு பின்பு இந்தியாவின் அடையாள வாசகமாக முன்வந்தது குறித்த வரலாற்று தகவல்களையும் பகிர்ந்து கொண்டார். சுவாமி விவேகானந்தர் அவர்கள்மன்னரின் ஆன்மிக ஞானம் கண்டு மன்னரை இராஜரிஷி என்று அழைத்தார் என்பதையும் தலைவர் அவரகள் பதிவு செய்தார்

இவ்வளவு சிறந்த மன்னரின் படங்கள் இந்திய தூதரகம் வழியே நடத்தப்படும் சுவாமி விவேகானந்தர் கலாச்சார மையங்கள் அனைத்திலும் திறக்கப்படுவதே வரலாற்றிற்கு வாய்மை செய்வதாய் அமையும் என்று குறிப்பிட்ட அவர் இம்மையங்கள் அனைத்திலும் மன்னர் பாஸ்கர சேதுபதி அவர்களின் படத்தை திறந்து வைக்குமாறு மாண்புமிகு பாரத பிரதமர் அவர்களுக்கும் மற்றும் வெளியுறத்துறை அமைச்சர் அவர்களுக்கும் கொரிய தமிழ்ச் சங்கத்தின் சார்பில் வேண்டுகோள் வைத்தார். மேலும் மாண்புமிகு தமிழ்நாடு முதலமைச்சர், மாண்புமிகு எதிர்க்கட்சி தலைவர், மாண்புமிகு பாராளுமன்ற உறுப்பினர்கள் மற்றும் தலைவர்கள் ஆகியோரும் இந்திய அரசிடம் இந்த கோரிக்கையை வலியுறுத்தி நிறைவேற்றுமாறு வேண்டினார்.

இறுதியாக சங்கத்திற்கு தேவையான பொருளாதார வளத்தை சேர்க்க இருக்கும் வாய்ப்புகள் குறித்து விளக்கினார். இதன்பொருட்டு இளமையான கொரிய தமிழ்ச் சங்கத்தின் வலுவான கட்டமைப்பிற்கு உலகில் உள்ள மூத்த தமிழ்ச் சங்கங்கள் உதவி செய்ய வேண்டும் என்று கேட்டுக்கொண்டார். உரையை ஆர்வமுடன் கேட்ட தூதருக்கும் சங்க நிகழ்வுகளில் முன்பு கலந்துகொண்ட தூதரக அதிகாரிகளுக்கும் நன்றி தெரிவித்து அமர்ந்தார்.

குறிப்பு:
      தலைவர் வழிகாட்டுதலுடன் உரையை எழுதியவர்கள்: பொறியாளர்கள் சுவாமிராஜன், சகாய டர்சியூஸ் மற்றும் முனைவர்கள் கார்த்திக் பத்மநாபன், சீனிவாசன் முனியப்பன் மற்றும் அந்துவன் இராஜேஷ் அவர்கள்.

புகைப்படங்கள்:
      முனைவர் இராமன் குருசாமி, பொறியாளர் மு. அனந்த் மற்றும் முனைவர் பிரதீப்

ஒசோங்-சோங்ஜு, (தென்) கொரியா - திருவள்ளுவர் ஆண்டு 2051, தை மாதம் 12-நாள் (சனவரி 26) அன்று கொரிய தமிழ்ச் சங்கம் ஏற்பாடு செய்திருந்த கொரிய பொங்கல்-2020 நிகழ்வு Korea Chungcheong-buk-do provincial government and Mulberry-Bio co-ordinate system (Chungcheong-buk-do) உதவியுடன் கே-பயோ நிலையத்தின் (K-bio center) அரங்கில் தமிழர் திருநாளுக்குரிய தித்திக்கும் பொங்கல்-கரும்பு, மகிழ்ச்சி பரிமாற்றத்துடனும் பண்பாட்டு விழிமியங்களுடனும் இனிதே நடந்தேறியது. பொங்கல் நிகழ்விற்கு அப்பகுதியின் ஆளுமைக்குரிய சுங் சோங் புக் தோ அரசு, மெல்பேரி உணவகம் மற்றும் பயோ கோ-ஒர்டினட் சிஸ்டெம் ஆகிய நிறுவனங்கள் ஒத்துழைப்பு வழங்கியிருந்தனர். கொரியாவின் பல்வேறு பகுதிகளிலிருந்து இளைஞர், பெண்கள், குழந்தைகள் என 200 பேர் கலந்துகொண்டிருந்தனர். நிகழ்வில் சிறப்பு விருந்தினராக கொரியாவிற்கான இந்திய துணைத்தூதர் மாண்புமிகு சதிஷ் குமார் சிவன், சுங் சோங் புக் தோ மாநில அரசின் பிரதிநிதி மற்றும் மெல்பேரி-பயோ உரிமையாளர்கள் திரு ரியூ ஜெ கியங், திருமதி இன்சொக் கிம் ஆகியோர் கலந்துகொண்டனர்.

முன்னதாக 26 சனவரி இந்திய குடியரசுதினம் என்பதால் கொரியா தமிழ்ச் சங்கத்தின் தலைவர் முனைவர் இராமசுந்தரம் அவர்கள் இந்திய கொடியேற்றி பொங்கல் விழாவினை தொடங்கி வைத்தார்.

நிகழ்வில் கலந்துகொண்ட தூதர் அவர்கள் கலந்துகொண்ட பொங்கல் விழாவில் கலந்துகொள்வதில் பெருமகிழ்ச்சியடைவதாக தெரிவித்த தூதர் அவர்கள், தூதரகம் மற்றும் இந்திய அரசின் சார்பில் கொரியாவில் வாழும் தமிழ் மக்கள் அனைவருக்கும் பொங்கல் வாழ்த்துக்களை தெரிவித்தார். கொரிய தமிழ்ச் சங்கம் வெளியிட்ட மாத நாட்காட்டியை தூதர் அவர்கள் வெளியிட மகளீர் பெற்றுக்கொண்டனர். அறிவியல் தொழில்நுட்ப பரிமாற்றம் செய்த விஞ்ஞானிகள் இருவரை தூதர் பாராட்டி நினைவுப்பரிசு வழங்கினார். குறிப்பாக தூதரகம் இங்குள்ள இந்திய மக்களுக்கு செய்யும் உதவிகள் பற்றி தெரிவித்த தூதர் மே-2020-ல் அனுசரணை வழங்கவிருக்கும் கிரிக்கெட் போட்டிகள் குறித்தும் மக்களுக்கு அறியத்தந்தார். பொங்கல் நிகழ்வில் கலந்துகொண்ட தூதர் அவர்களுக்கு தமிழ்கூறும் நல்லுலகின் சார்பிலும் கொரியாவாழ் தமிழ் மக்களின் சார்பிலும் கொரிய தமிழ்ச் சங்கத்தின் தலைவர் மனமார்ந்த நன்றியை தெரிவித்தார்.

பொங்கல் நிகழ்வை சுங் சோங் புக் தோ மாநிலத்தில் நிகழ்த்துவது குறித்து மகிழ்ச்சி தெரிவித்த அரசின் பிரதிநிதி தமிழ் மக்களுக்கு கொரிய திருநாளான சொல்-நாள் (சந்திர வருட பிறப்பு) மற்றும் பொங்கலுக்கான வாழ்த்துக்களை தெரிவித்தார்.

நிகழ்வில் குழந்தைகள் குழுவாகவும் பெற்றோருடனும் கலந்துகொண்ட கலைநிகழ்ச்சிகள், கோலப்போட்டி, உறியடி ஆகியவை இடம்பெற்றது.

மேலும் கொரிய-இந்திய உறவுகளுக்கு கலாச்சார பண்பாட்டு மணம் பரப்பும் வகையில் கருத்தியல் மற்றும் செயல்முறையில் பொங்கலையொத்த கொரிய அறுவடைத்திருநாளான சுசோக் திருவிழாவிற்கும் இடையேயான ஒற்றுமை குறித்த காணொளி வெளியிடப்பட்டது.

அடுத்ததாக கொரிய தமிழ்ச் சங்கம்-பயோ கோ-ஒர்டினட் சிஸ்டெம் (Bio Co-ordinate System, Cheongcheong-buk-do Province, Korea சுங் சோங் புக் தோ மாநிலம்) நிறுவனம் இடையே கல்வி, சுற்றுலா, பண்பாட்டு பரிமாற்றம் மற்றும் தொழிலக உறவுக்கு பணியாற்றுதல் ஆகிய துறைகளில் இணைந்து செயல்பட புரிந்துணர்வு ஒப்பந்தம் செய்யப்பட்டது.

கொரிய பொங்கல் நிகழ்விற்கு தமிழ்நாட்டிலிருந்து மூத்த பாராளுமன்ற உறுப்பினர் மாண்புமிகு வைகோ, பத்மஸ்ரீ தமிழிசைக்கலைஞர் முனைவர் நர்த்தகி நடராஜ், பிளாஸ்டிக் மேன் ஆப் என்று அழைக்கப்படும் பேராசிரியர் பத்மஸ்ரீ இராஜகோபாலன் வாசுதேவன், தமிழர் தொன்மை-கடல் ஆய்வாளர் ஒரிசா பாலு, மற்றும் திரைப்பட இசையமைப்பாளர் திரு. ஜேம்ஸ் சிவஞானம் வசந்தன் ஆகியோர் வாழ்த்து அனுப்பியிருந்தனர்.

நிகழ்வின் முக்கிய அங்கமாக தமிழர் திருநாள் உரையாற்றிய கொரிய தமிழ்ச் சங்கத்தின் தலைவர் முனைவர் சுப்பிரமணியன் இராமசுந்தரம் அவர்கள், கொரியா-இந்திய உறவுகளின் முக்கியத்துவம் குறித்தும், 1987 முதல் விரிந்திருக்கும் சமகால கொரிய தமிழர் வரலாற்றை விளக்கி, தமிழர்கள் தொழில்முனைவோராக, கொரியாவின் வளர்ச்சிக்கு பங்காற்றும் கண்டுபிடிப்பாளர்களாக மேன்மேலும் மிளிர வேண்டியதன் தேவைப்பாடு பற்றியும் பேசினார். குறிப்பாக தமிழர்கள் இந்திய நாட்டிற்கு ஆற்றிய பங்களிப்பு குறித்த பேசிய தலைவர், வெளிநாடுகளில் இந்திய தூதரகம் வழியே நடத்தப்படும் சுவாமி விவேகானந்தர் கலாச்சார மையங்கள் அனைத்திலும் விவேகானந்தர் அவர்களின் புரவலர் மன்னர் பாஸ்கர சேதுபதி அவர்களின் படத்தை திறந்து வைக்குமாறு மாண்புமிகு பாரதபிரதமர் அவர்களுக்கும் மற்றும் வெளியுறத்துறை அமைச்சர் அவர்களுக்கும் வேண்டுகோள் வைத்த சங்கத்தின் தலைவர், இதனை மாண்புமிகு தமிழ்நாடு முதலமைச்சர், மாண்புமிகு எதிர்க்கட்சி தலைவர், மாண்புமிகு பாராளுமன்ற உறுப்பினர்கள் ஆகியோரும் இந்திய அரசிடம் இந்த கோரிக்கையை வலியுறுத்தி நிறைவேற்றுமாறு வேண்டினார்.

பொங்கல் நிகழ்வை சங்கத்தின் அறிவுரைக்குழுவினர் முனைவர்கள் போ. கருணாகரன், செ இரத்ன சிங், இரா. அச்சுதன், அ. அந்தோனிசாமி மற்றும் தா, செபக்குமார், துணைத்தலைவர் முனைவர் திருமதி கிறிஸ்ட்டி கேத்தரின், செயலர்கள்-முனைவர்கள் கு. இராமன், செ. ஆரோக்கியராஜ் மற்றும் மோ. பத்மநாபன், முதன்மை பொறுப்பாளர் திரு. லோ. ஆனந்தகுமார், ஒருங்கிணைப்பாளர்கள் திரு. கோபாலகிருஷ்ணன், திரு. பிரபாகரன், திரு மு. ஆனந்த், திரு. வே. ஜனகராஜ், திருமதி. பிரியா குணசேகரன், திருமதி சரண்யா பாரதிராஜா, திருமதி. மதுமிதா வாசு, திருமதி தெ. விஜயலட்சுமி மற்றும் திரு. இந்திரஜித், தகவல் தொழில்நுட்ப பிரிவு பொறுப்பளர்கள்-பொறியாளர்கள் திரு சகாய டர்சியூஸ், திருமதி சரண்யா மதி, பொருண்மிய பொறுப்பாளர்கள்-முனைவர்கள் கார்த்திக் பத்மநாபன் மற்றும் அந்துவன் இராஜேஷ் சீனிவாசன் ஆகியோர் ஏற்பாடு செய்திருந்தனர். நிகழ்விற்கு சக்ரா இந்திய உணவகம், GME பண பரிமாற்ற நிறுவனம், சைனி ஸ்டார்ஸ் விளையட்டுக்குழு, மிரகில் வேர்ல்ட் பவர், மற்றும் ஜேஆர் பிக்செல்ஸ் தமிழ்நாடுஆகியோர் துணை உதவி செய்திருந்தனர்.